قلق

يرهقنى الصمت

أبدأ بالحديث مع نفسى

أرهقها بحديثى

أبحث عن أجاباتى فى عيون الآخرين

وأرهقهم فى محاولات يائسة لفهمى

كان عندى كلام كتير اوى اقوله وأسئلة كتير بتدور جوايا ومش لاقيالها أجابة بس حسيت أنى استريحت لما كتبت الخاطرة الصغيرة دى
حسيت أنها لخصت كل حاجة

تاج ... عادى يعنى

أخيراً وبعد طول غياب ... وزى ماوعدت ضياء ومونى اللى ربنا يسامحهم بقى على التاج ده

خمس حاجات محدش يعرفهم عنى

هو هيبقى صعب أوى ان يبقى مفيش حد خالص يعرفهم لأنى فضيحة أصلاً بس هحاول

أول حاجة

رغم أنى على طوول بسامح وبنسى أما حد يعمل فيا موقف بايخ بس لو الموقف اتكرر مع نفس الشخص بتحول لشخصية شريرة جداً وبتمنى فى اللحظة دى أنى أأذى اللى قدامى أو انتقم منه وتجيلى أفكار سودة وبحس ساعتها أنى ممكن أعمل أى حاجة و أخد مليون قرار بس الحمد لله بتبقى بس قرارات فى ساعتها وبعديها ببتاع ساعة ولا ساعتين بنسى كل ده .

تانى حاجة

دى يمكن بتحصلنا كلنا

أنى فكرت فى الأنتحار كتير ... طبعاً مخدتش الحمد لله أى خطوة والموضوع لم يتعدى حيز التفكير

وطبعاً لأسباب هايفة

اللى يضحك أن أكتر حاجة كنت بفكر فيها انى ابلع دوا الضغط بتاع ماما مش عارفة اشمعنى ده .

تالت حاجة

أنى ساعات كتير أوى مهما كنت مبسوطة ومودى حلو وأنا راكبة أى وسيلة مواصلات وقاعدة جنب الشباك ببص على الشوارع وهى بتجرى قدام عينى بتجيلى حالة أحباط وحزن فظيعة

وساعات بتوصل للعياط خاصة لو فى أغنية كمان حزينة شغالة

بس بجد معظم الأوقات لو ركزت وانا باصة من الشباك بلاقينى بنزل ضاربة بووز ومش عايزة أكلم حد

يمكن ساعتها بحس أوى أن اللى فات مش ممكن يرجع تانى .

رابع حاجة

بيقولوا عليا عندى جنون اجتماعى

أنا فعلاً بحب الناس أوى بس فى بيتنا عندى انعزال فظيع تقريباً مش بيشوفونى

حاطة تليفزيون فى الأوضة عندى وتلاقينى قاعدة منكمشة فى ركن كده بتفرج عليه ومستخبية وراه حتى عشان ابقى مش باينة

وممكن أفضل بالساعات كده ومكلمش حد خالص ... حتى ساعات ماما بتقول عليا معقدة نفسياً .

خامس حاجة

كان لازم يبقوا خمسة يعنى

مش عارفة بقى

بقالى نص ساعة اهو عمالة افكر فى اى موقف

ممكن نقول محدش يعرف انى لما بزعق واعلى صوتى واتنرفز تلقائياً دموعى بتزل لوحدها ودى حاجة مبعرفش اتحكم فيها خالص بمجرد انى اكون وصلت لمرحلة الصوت العالى بقى يبقى خالص لازم اعيط حتى لو الموضوع لا يستدعى الدموع ومجرد مناقشة عادية واحتدت لازم دموع

بسسسسس كده

عملت اللى عليا وزيادة حبتين أهو

ممكن امرر التاج بقى

أصل الموضوع عجبنى أوى

همرره طبعاً لأوما ولميا و ياسمينا و سيف و صلصا

تخاريف صيام

تحت شعار أدينا بنهيس ورانا ايه وبما إنى مش عارفة أصور المترو لسه ( هو لو حد شافنى وانا بصور المترو هيحصل حاجة ؟ ) وبما أن الناس بتطالب ببوست جديد وبما أن جوايا كلام كتير وأفكار متلخبطة وناس داخلة وخارجة وبما أنى كنت صايمة اليومين دول كل سنة وانتوا طيبين يبقى ذنبكوا على جنبكوا بقى

هو أنا كبيرة ؟
بقالى فترة بسأل نفسى السؤال ده ولما موصلتش لنتيجة أو جايز النتيجة معجبتنيش قررت أسأل الناس
بس للأسف مش كلهم فهمونى لأنى مقصدش السن خالص
هو لازم يعنى عشان أنت كبير تبقى عاقل كده ومتزن وبتكلم بحساب ومتغلطش
طب هو الواحد لما يتصرف تصرفات طفوليه أو يبقى على سجيته يبقى أهبل وعبيط
مش عارفة هل فعلاً السن بيحكم الأنسان
مرة واحد قالى أنتى مش كبرتى على المصاصة واستغربت أوى وقعدت اضحك وقلتله هى دى كمان بيكبروا عليها وساعتها أفحمنى وقالى يعنى لو شفتى باباكى بياكل مصاصة هتستغربى ولا لأ فكرت لقتنى فعلاً هستغرب أو المنظر مش هيبقى نورمال طب ليه ... !!
يعنى أنا لما هكبر وأتجوز وأخلف مش هاكل مصاصة
والقضية مش قضية مصاصة طبعاً

طب هو أنا مجنونة ؟

ساعات كنت بقول لنفسى - وواضح انى بقولها حاجات كتير يعنى - أن فى نوع من الناس كده عمرهم ما هيستريحوا أبداً وانا منهم
ايه الدماغ دى ؟ ليه كده اللى أنا بعمله ده ؟ ليه كمية التفكير الفظيعة دى ؟
ليه أى حاجة مش بتمر عليا بسهولة ؟ ليه لازم اسباب ونتائج ودوافع وتخمينات لأى موقف بيحصلى لكل كلمة بتتقالى لكل أغنية بسمعها ؟؟؟

عارفة إنك مستنية البوست بتاع قصة حبنا
بس انتى مش عارفة انى بجد حاولت كتير ومسحت كل اللى كتبته
بس مصممة برضه أنى أكتبه
بس عايزاه يبقى فجأة كده ... عشان عايزة ابسطك
بغلس عليكى ... علشان لقيتك مرة واحدة وحشتينى
عشان أنتى غيرهم
...........................................................
إمبارح صحيت من النوم سألت نفسى سؤال عجيب أوى
هو انا نمت ولا لأ ....؟؟
...........................................................................
نفسى أعرف إمتى هتخلص من العادة دى
لو سرحت دقيقة فى وسط الشغل أفوق الاقينى كلت ضوافرى ووصلت لكوعى ومتعورة وحالتى حالة
........................................................................................
حالة غريبة جاتلى من يومين وحسيت كده انى كشيت وبقيت صغيرة أوى وأنزويت فى ركن على السرير قدام التليفزيون وفتحت كاميرا الموبيل وفضلت أصور كان ساعتها مسلسل اللقاء التانى وأنا بعشق المسلسل ده بكل تفاصيله أحداثه وموسيقته وكانت حلقة بعنوان أسوار الذكرى وبلا فخر عيطت فى أخرها مع انها كانت حلقة عبيطة جداً
........................................................

ايه يا بنتى ده
ايه حالة الحب اللى واخدانا اليومين دول
النهاردة وانتى بترنى كنت مشغولة أوى وقرفانة وسمعت رنتك ابتسمت هى مش ابتسامة بس هى حالة فرح
نسيت أقولك أنى حطالك نغمة أخاف ليه بتاعت لؤى ... لؤى هاه
عجبتنى قصاد عينى
ومستنية يوم السبت
والبوست بعد اليوم ده هنكتبه سوا

قصاقيص ورق

فى وسط زحمة الحياة والناس والبيت والشغل والأصحاب والخروجات وحضرتك ويا افندم وحاضر وطيب
قررت القرار الأسبوعى بتاعى فى يوم الأجازة وهو توضيب دولابى واخراجه من الحالة المفزعة اللى وصلها
وتحت ورقة الجورنال العتيدة فى أول رف لقيتهم
قصاقيص ورق
كمية اوراق صغيرة مش طبيعية

حاجات ضحكتنى وحاجات استغربت منها وحاجات مش فاكرة اصلاً كتبتها لمين ولا ليه
ودى نماذج منها

sometimes i feel i miss something - a big thing - but i have no idea what that thing could be
وفعلاص بيبقى جوايا الأحساس ده
فى حاجة نقصانى
يمكن عارفة وبستهبل زى ما مونى قالتلى قبل كده

whats worng with me
طبعاً نرفزتى واضحة وانا بكتب الجملة دى



حسيت فى حاجة بينا
أرق أغنية رومانسية سمعتها فى حياتى
بتفكرنى بالصيف أوى
بخوخة
وقعدتنا للفجر على النت نتكلم فى كل حاجة واى حاجة
بقعدتنا على الرصيف قدام جاد اللى جنب الزعفران مول بنغنيها و بنشرب البيبسى اللى شيرو عازمنا عليه اكمنه كبير القعدة يعنى


أخر جملة فى خاطرة صغنونة اسمها تأكد انى نسيتك تحت عنوان ذكريات هنا فى البلوج ابقوا تعالوا زوروها

حتى المناديل معتقتهاش



يمكن من اواخر الورق اللى كتبته ونسيت انى كتبته أصلاً
احساس سيطر عليا
مش هقولوكوا مكتوب فيها ايه
وإن عرفتوا تقروها اقروها
كتبتها بسرعة لأنه احساس سيطر عليا ساعتها


دى قصقوصتى المفضلة
أجمل واحلى حب فى حياتى
خوختى


ده بالأضافة لأوراق من الشغل محتفظة بيها لمجرد ان مكتوب فيها اسمى
وورق تانى بخط اصحابى حاجات من ايام الثانوى
وكروت وتذاكر سينما وكروت شحن
جمعتهم كلهم
وحطيتهم فى شنظة صغيرة
وكتبت عليها
قصاقيصى

يا عينى عليكى يا طيبة

مع إنى بقالى فترة قالباها كآبة

وكلام عن الحياة وخداعها والغش والتمثيل
وكان نفسى أكتب حاجة كده ترجع روح التفاؤل تانى للبلوج احسن أنا قلبتها ضلمة خالص
بس
مش قادرة افهم ليه مش قادرة أسمع اغنية غيرها ..!
ليه أول ما بتقع إيدى على ورقة بكتبها ... !
مع إن كلماتها بتوجع أوى
صوت امال ماهر مع اللحن
بحس أنها بتصرخ من جواها بجد
بحس أنها بتقولى انتى كمان مسئولة ,,,
بعيدأ بقى عن انها اغنية فيلم خيانة مشروعة
وبعيداً عن احداث الفيلم
وبعيداً عن أنى مش عارفة مين اللى كتب الكلام الرائع ده
بس فعلاً هى دى الحياة

يا عينى عليكى يا طيبة ... لما بتضيعى منا
لما بنصحى نلاقينا ... بقينا حد غيرنا

وفى عز الإحتياج لحضن يضمنا
وفى عز الإشتياق لحضن يضمنا
قادرين إزاى ندوس ... على قلب حبنا
وبقينا إزاى كده
بقينا إزاى كده

أجمل ما فينا قلب ... أصبح حتة حجر
أتعلم الخيانة ... واللعب بالبشر
ومين اختارلنا ... وإحنا إزاى رضينا ؟؟؟
نعيش وحوش فى غابة ونقول مكتوب علينا
يا عينى عليكى يا طيبة ... لما بتضيعى منا

وآه من يوم هيجى مليان جرح والم
هتدور الدايرة بينا وهندفع التمن
وتصرخ مهما تصرخ ... ولا حد هيسمعك
مفيش مركب هتقدر بالعمر ترجعك

يا عينى عليكى يا طيبة ... لما بتضيعى منا
لما بنصحى نلاقينا ... بقينا حد غيرنا

وفى عز الإحتياج لحضن يضمنا
وفى عز الإشتياق لحضن يضمنا
قادرين إزاى ندوس ... على قلب حبنا
وبقينا إزاى كده
بقينا إزاى كده

فلسفة فارغة

ما الحياة الا مسرح كبيركل الأحداث اللي حوالينا .... كل الأشخاص المحيطين بينا .....تمثيل فى تمثيل

مش تمثيل بمعنى إننا بنضحك على بعض ولا بنغش بعض أصل المشكلة ان التمثيل مبقاش هواية ولا موهبة .... لأ .... بقى جزء من كل واحد فينا والأذكياء اللى بيعرفوا يوظفوه صح.الحياة بقت مملة وسيناريو الواقع محفوظ وأنت وشطارتك تمثل أكتر ... تمثل أحسن .... السيناريو بتاعك يكبر والناس تسقفلك اكتر

الخير لازم ينتصر على الشر... ده يمكن شعار الأفلام وفى فيلم الحياة الموضوع مبيختلفش كتيرأدوار الخير كتير اوى ... أقنعة الطيبة مختلفة غنية وفقيرة .... طويلة وقصيرة ........عارفين وراضيين وساكتين ليه ؟؟؟

عشان مش تعبانين....عشان ناسيين ..... مستريحين كده مش لازم عشان زعلانين ننكد على الناس كلها .... يمكن لو مثلنا اننا مبسوطين نتبسط بجد يمكن لو مثلنا دور الطيبين ننسى الشر اللى جواناوهكذاعارفين لما واحد بيقول كلمة حق أو يحاول يكون نفسه بيقولوله أيه"متمثلش متمثلش"مش بقولوكوا التمثيل بقى جزء مننا لدرجة اننا خلاص لما بنحاول نكون نفسنا يبقى هو ده التمثيل

عشان كده انا عارفة انتوا عايزين تقولولى ايه دلوقتى

لحظة إكتئاب

لازلت تلك الطفلة البريئة الحمقاء . لازلت لم أستوعب بعد كم المسئولية الملقاه على عاتقى . لازلت أحب أى شخص اتبادل معه بعض الكلمات العادية . لازلت كئيبة لا تكاد ساعات أفراحى تبدأ حتى تنتهى . لازلت لم أتعلم شيئاً . لازلت أتمسك ببعض الأفكار الغريبة . لازلت اتعلق بالأماكن . لازالت علامات الحزن تظهر على وجهى بوضوح كلما أخطئت . لازلت بنفس العصبية . لازلت أسعى وراء الكمال . لازلت أتعجب من سلوك من هم حولى . لازلت أتسائل أهذه هى الحياة . لازلت فى حيرة بين الصواب والخطأ . لازلت أبكى بدون اسباب فى بعض الأحيان . لازلت أنبش قبور الماضى . لازلت لم أجد السعادة الحقيقية . لازلت أجيد الهروب من أتخاذ القرارات

كنت قد حاولت أقناع نفسى أنى تغيرت كثيراً
ويالأسف لازلت انا.

مجرد لحظة
لحظة من بين اللحظات الكتير اللى بضحك فيها على نفسى واقول أكيد انا اتغيرت
لحظة شفت فيها كل الكلام ده جوايا
شفت فيها نفسى بجد من غير رتوش
لحظة وعدت

حــنــظــلــة

حنظلة
معرفش ليه افتكترتها النهاردة الصبح وطبعاً قعدت أضحك
حنظلة دى عروسة صغيرة أمورة اوى كانت هدية من أخويا
زى ميدالية كده

كنت متعودة دايماً أعلقها فى شنطتى وانا رايحة الكلية
بس مكانتش زى اى عروسة بتتعلق
وأصحابى لما كانوا بيشوفونى جاية من بعيد وعايزين يتأكدوا إن أنا بيبصوا يشوفوا معايا حنظلة ولا لأ

ليها معايا مواقف وذكريات كتير أوى
لما اتجمعنا عشان نتصور كل الناس كانت مصممة إنها تتصور مع حنظلة
أحياناً كانت بتحضر محاضراتى وأنا لأ
لأن أحياناً كتير كنت بسيب الشنطة فى السيكشن وأزوغ
طبعاً حنظلة ده مش وليد الفراغ
هو جه كده من غير قصد
نائل ابن خالتى كان بيتكلم على واحد زميلى فى الكلية شبه حنظله اللى بنشوفه فى الأفلام التاريخية الدينية القديمة أوى دى
وفى نفس الوقت أنا كنت ماسكاها
ثبتت فى دماغى أنه بيقول عليها هى
وخلاص من ساعتها أى حد سألنى على اسمها أقول حنظلة
وكل ما أغير شنطة لازم أعلق حنظلة فيها
وللأسف اختفت فى ظروف غامضة
بس قررت أنى لازم أدور عليها والاقيها
عشان تعيد أمجادها من جدي
وبعد جهود مضنية
طلت عليا بنفس ابتسامة زمان
ورجعت معاها حاجات كتير اوى

مش عارفة

مش عارفة

كلمة لا تحمل اى معنى أو رد فعل

ومع ذلك لقيتها واخدة مساحة كبيرة اوى من حياتى

ويمكن من حياة ناس كتير

لقيت معظم ردودى بمش عارفة

حتى وانا بتناقش فى أى موضوع

لازم تدخل فى وسط الكلام

ساعات بحس فعلاً انى مش عارفة

ومش عارفة يعنى مش عارفة دى

ممكن نقول تايهه

مش عارفة أفكر

مش عارفة أعبر

مش عارفة أنا عايزة ايه

مش عارفة انا مبسوطة ولا مضايقة

مش عارفة انا مرتاحة ولا لأ

مش عارفة انا ليه كلمت صاحبتى دى ومكلمتش صاحبتى التانية

مش عارفة ليه الفكرة دى تيجى فى بالى

مش عارفة ارد فى الموقف ده اقول ايه

عايشة والحمد لله وكويسة

بـــــــــــــــــــس

مــــش عــــارفــــة

بينى وبين نفسى

ترددت مرات و مرات............وأحتار قلمى معى..... وأخذت نفسا عميقا و ...... قررت
لن ادع هذا الشعور يهزمنى
لن اترك نفسى لأمالى الواهية
عقدت العزم
لا تنظرى للوراء..............لا تفكرى بالماضى
وبداخلى اعرف جيدا انها مجرد كلمات ترتاح لها نفسى لفترة من الزمن
وبعد
أعود.............وأبحث عن صورته
اتأملها..........و يضيع منى الوقت.........واتذكر
أحبك
حين قالها للمرة الاولى
ولأول مرة
احسست بأنى كالطفلة التى تتصنع الدلال ليحنو عليها والديها
كنت اخطو خطواتى الأولى فى طريقى للحب الابدى
و فجأة
وجدتنى تائهة
بحثت عنه فى كل مكان
تركنى
تركنى فى لحظة
تركنى فى لحظة حتى اننى لم أجد الوقت الكافى لأبكى عليه
تركنى و يا ليته يترك احلامى
ولازلت تائهة
بل حائرة
أهذا هو ما تسمونه الحب؟؟؟؟؟؟؟؟؟؟؟؟؟؟؟؟؟؟؟
أذن
فلتظل وحيدا يا قلبى

لمة العيلة

يوم مش طبيعى
يوم الجمعة اللى المفروض أنه يوم الأجازة اللى الواحد بيقضيه فى هدوء
صدر فيه قرار جمهورى بتجمع العيلة
وكان من المتوقع حضور 65 فرد
لكن ربنا ستر واللى قدروا يحضروا 43 بس



سيبكوا من الكبار اللى كان كل واحد ماسك ودن اللى جنبه
والدوشة والزيطة اللى استحالة تسمع فيها كلام اى حد .

سيبكوا من كمية الموبيلات اللى كانت دايرة بتصور.

سيبكوا من خناقة المخدات الشهيرة بين أمير وراجية اللى صورتها فيديو و اللى معرفش لحد دلوقتى سببها ايه
سيبكوا من راجية اللى خدت كام خبطة فى الحيطة وفقدت الذاكرة .

سيبكوا من المخدة اللى جت فى الموبيل بتاعى وقعته على الأرض .

سيبكوا من سيف اللى قعد فى وسط الصالون بالجيتار بتاعه يعزف عليه وحط قدامة طبق بلاستيك كده يلم فيه فلوس





سيبكوا منى وانا معظم القعدة بسقف وأزغرط .

سيبكوا من باسم اللى كان بيغلس علينا وأحنا بنتصور ولقطناله حتة صورة هنذله بيها العمر كله .

سيبكوا من الناس اللى كانوا بيجى يسألونى هى مين اللى كانت قاعدة جنبى دى .

سيبكوا من الباجز بنى اللى معظم الناس طالعة فى الصور حاضناه .

سيبكوا من الأطفال اللى اتجمعوا كلهم على الكمبيوتر مشفناهمش .

سيبكوا من الهدوء القاتل اللى حسينا بيه بعض ما مشيوا
كانوا كام ساعة تحفة
وفرقوا فى الموود بتاعى كتير
والصورة اللى خدتها أنا وخوخة طلعت حلوة أوى
ربنا يخلينا لبعض
ويخلى كل واحد لعيلته
ويجعله عامر

MSG

FOR ALL WHO ENTERED MY LIFE & LEFT BUT AFTER THEY LEFT THIER SPECIAL PRINTS IN MY HEART.....
I'LL NEVER FORGET U ALL
NEVER

الوتر الحساس

كتير أوى لما نمر بتجربة وفى الغالب بتكون قاسية ونسمع أغنية بتحكى عن تجربة تشبه تجربتنا بنحبها وبنحب نسمعها ومش مهم المووود اللى بنبقى فيه بس بنستمتع بوجود شخص تانى بيشاركنا محنتنا ونقول
أصلها لمست الوتر الحساس

وساعات نسمع أغنية نحس بيها أوى ونعيشها فى خيالنا بكل تفاصيلها مع إننا عمرنا ما عشنا تجربة مشابهة ليها

وساعات نخاف يجى علينا يوم ونبقى احنا اللى فى الموقف ده

أغانى تحسسنا بالفرحة والسعادة ... تحس إنك بجد عايز ترقص من جواك

وأغانى بتجبر دموعنا على النزول

أغانى تصيبك بحالة يأس وأحباط

أغانى تقلب عليك الذكريات

أغانى تخوفك من المستقبل

أغانى تديك أمل فى بكرة

اغانى تحسسك قد ايه انت وحيد

اغانى تفتح جروح اتقفلت من زمان

أغانى تجبرك على اعادتها و ساعات سماعها طول اليوم

أغانى تبقى مش قادر تستنى وعايز تسمعها لحد بتحبه

أغانى وكل واحد بيدور فيها على نفسه

بجيلك من ورا الأحزان

بجيلك من ورا الأحزان .... ولسه فاكر العنوان
ولسه فاكر العنوان

بجيلك من ورا الأحزان .... ولسه فاكر العنوان
ولسه فاكر العنوان

أنا حضنك وتكوينك .. والمكتوب على جبينك .. وأنا اللى فى اخر الرحلة
بلاقى عمرى فى سنينك
بجيلك ... بجيلك ... بجيلك من ورا الأحزان

وانا ليكى وعمرى انتى ... غريب من هواكى انتى ... فى لحظة ضعف تحيينى
ولما الغربة تغوينى
تردينى لحضنك يوم ... ولا غيرك هيطوينى ... فى لحظة ضعف تحيينى
ولما الغربة تغوينى
بجيلك .... من ورا الأحزان

سكوتى مش الم فيا ... وضعفك ليا حنية ... يا اول صورة فى عيونى
يا ساكنة جوا تكوينى
الام الغربة ما تأثر ... سكوتك بس يكوينى ... يا أول صورة فى عيونى
يا ساكنة جوا تكوينى
بجيلك ... بجيلك من ورا الأحزان


بجيلك من ورا الأحزان .... ولسه فاكر العنوان
ولسه فاكر العنوان

بجيلك من ورا الأحزان .... ولسه فاكر العنوان
ولسه فاكر العنوان

أنا حضنك وتكوينك .. والمكتوب على جبينك .. وأنا اللى فى اخر الرحلة
بلاقى عمرى فى سنينك
بجيلك ... بجيلك ... بجيلك من ورا الأحزان

مش عارفة ليه إفتكرت الأغنية دى فجأة
يمكن عشان حالة الحنين اللى فيها
كنت بسمعها من زمان أوى
يمكن حتى قبل ما أستوعب كل معانى كلماتها
كان بيلمسنى لحنها ورقة الكلام ورقة صوت حميد وعلاء
تحفة بكل المعايير

زمان ... وأحاسيس زمان

نفس الأحساس بتاع زمان إنك عايز تكتب كتير أوى ومش عارف تكتب ايه ولا لمين بس القلم بيجرى منك كأنه بيقرا أفكارك قبل ما أنت نفسك تستوعبها.

كلام محفوظ ومكرر و بقوله كتير كأنه فيلم عربى قديم بس ده ميمنعش إنى لسه عايزة أكتب برضه
عارف لما تبقى ماشى فى الشارع وفجأة تفتكر شخص ما ويبتدى شريط أحداث يمر قدام عينيك وتبتدى ملامح ابتسامه تغطى على ملامحك وغالباً بتفوق من كل ده على كلاكس عربية بينك وبينها 2 سم ومفيش مانع تسمع كلمتين على غرار مش تفتح يا .....
سيبك من كل ده خليك فى اللى افتكرته .. مش عايزين نسمح لحد يفوت علينا اللحظة الحلوة دى
ذكريات كتير فى حياتنا ساعات بيبقى نفسنا الزمن يرجع بينا تانى يا اما عشان نصحح غلط ومنعرفش الحد الفلانى ونمسح من ذاكرتنا الفترة العصيبة اللى عشناها بسببه يا اما عشان نعرف الحد الفلانى اكتر ونكلمه أكتر ومنسمحلوش يختفى من حياتنا

بعدها تبتدى تدندن بأغنية جت فى بالك متعرفش ليه
وتسأل نفسك انا بفتكر الحاجات دى ومتلاقيش إجابة
وتكمل مشى عادى
وتنسى كل حاجة

وعجيبة يا شوارع تشبه ملامحانا ... أعجب مافيكى إحنا ... الله يسامحنا

عايزة أناااااام

نفس الفكرة اللى بصحى عليها يومياً تقريباً
عايزة أناااااااااام

هو فيه ايه النهاردة ؟
إحساس غريب ونظرة حزن فى عينيا طبعاً انا مش شايفاها بس حاسة بيها
شكله يوم ممل ... هو النهاردة ايه
الثلاثاء
هو بعينه بغباوته
من أيام الدراسة واليوم ده واقف فى زورى
يييييييييي
بتاوب من دلوقتى وأنا لسه فى المترو
أومال هقضى التسع ساعات الجايين إزاى
أعمل ايه يعنى ... عايزة أناااام

مكتبى العزيز
مش عارفة ليه بمجرد ما بقعد على الكرسى بفتكر هنيدى فى فيلم صعيدى فى الجامعة الأمريكية لما كان فى الكافيه مع طارق لطفى وقاله مش تعملوا كراسى على قد الزباين
مش هينفع كده أنا شكلى هنام بجد
مفيش غير كوباية شاى سخنة هى اللى هتفوقنى
وطبعاً لازم اسمع كلمتين من ابراهيم عامل البوفيه من نوعية من إمتى وخلصولنا الشاى بقى بس تهريج طبعاً

الله
منظر البخار الخارج من الشاى بيحسسك بالدفا
الشاى تقيل المرة دى مع انه عارف إنى بحبه خفيف أوى
بس هشربه برضه
لأ بجد فى ايه
حبكت يعنى الدكتور يخرج يسألنى على حاجة فى اللحظة اللى بتاوب فيها
شكلى وحش أوى
مش مهم ... أعمل ايه يعنى ... عايزة أناااام

شغل
أحمدك يا رب
هما 3 أجهزة بس
مش هياخدوا وقت ... بس مفيش مانع أنى اتلكع وادلع واستهبل شوية عشان ياخدوا وقت
خلصوا
وها قد غادر أخر شخص معايا فى الشقة
يعنى صباح الفراغ والهدوء
إبراهيم تانى
قعد ينكت وضحكت
قالى جملة حلوة أوى
قالى مفيش حاجة بتضيع هم الشغل غير الضحك والأبتسامة
قلتله مش هم الشغل بس ده بيضيع كل حاجة
قالى الا العمر ... ورنت فى ودنى الكلمة دى

لازم يقطعوا عليا لحظة الهدوء
أهو عم ياسر عايز ينضفلى المكتب
يا عينى كل مرة يفضل يمسح فى الكىبورد اللى انا هارياها شخبطة

دقات الواحدة والنصف تعلن عن معاد طلوعى الدور اللى فوق عشان أصلى الظهر واستنى العصر وأصليه بالمرة
بفضل قاعدة فوق بحجة عمل ورق وأى حاجة عشان منزلش الا قبل معاد المغادرة بحاجة بسيطة يعنى يادوب وقت يسمحلى إنى اقفل الكمبيوتر و اتمم على الشقة وأقفل دولابى بالمفتاح

دقات الرابعة والنصف
تعلن عن انتهاء وقت العمل الرسمى وانتهاء يومى معاه
أصلى هروح البيت اعمل ايه هنام وأصحى احضر حاجة بكرة والحق أنام تانى

وبعد 11 محطة مترو ومكيروباص من المترو لبيتنا

تصبحوا على خير

أول مرة

أول مرة فى حياة كل أنسان بتبقى أصعب مرة ودى حاجة معروفة
سواء أول مرة مشى أو حب ولا حتى عوم
وبتجر باقى المرات بعديها وبتبقى اسهل كتير أوى
أول يوم دراسة
أول يوم شغل
أول يوم جواز
كلها بيبقى ليها قيمة كبيرة عندنا
ويمكن بنحتفظ بذكرياتها طول العمر
لأنها غالباً بترتبط بموقف كوميدى او محرج

أول يوم دراسة
أكدب لو أقول فاكراه
بس بيقولولى أنى لا عيطت ولا حاجة
وانى كنت مبسوطة بالجو الجديد

أول يوم ثانوى
اتنقلت من مدرسة اعدادى الخاصة لمدرسة ثانوى عام
صحيح كل أصحابى كانوا معايا بس اول مرة ننفصل فى الفصول
وكنت انا على حظى لوحدى تماماً
كان يوم بشع وكنت بتمنى يعدى بقى عشان اشوفهم
وخدت وقت طويل على ما اتعرفت على ناس
وبعدها الموضوع بقى سهل اوى وتقريباً عرفت المدرسة كلها

أول يوم جامعة
فرحة مش ممكن
وابتسامة غير عادية
كنت مشغولة ببص على كل الناس
بتفرج على دنيتى الجديدة اللى هقضى فيها أربع سنين من عمرى
لحسن حظى انى كان معايا انتيمتى من ابتدائى نرمين
وكانت معايا فى نفس الكلية ونفس القسم كمان
وهى اللى صبرتنى بصراحة على سنين الكلية

أول مرة ازوغ من محاضرة
كانت فى سنة تانية فى النص الأول
كان ضميرى واجعنى اوى
وقعدت ساعة على ما قررت اسيبها
وحتى كنت ماشية مروحة البيت يعنى مش هخرج ولا حاجة
بس بعد كده بقى نادر انى احضر اصلاً

أول يوم شغل
كأنه لسه امبارح
قلق فظيع وترقب رد فعل اللى حواليا
كنت مبسوطة طبعاً
ومش عارفة اليوم عدى عليا إزاى
بس اتعلمت حاجات كتير أوى
عرفت فى اليوم ده ارقام واسامى وكان ناقص اطبقها على الوشوش بقى

ودى كانت اخر اول مرة فى حياتى لحد دلوقتى

إهداء لأحلى خوخة

حتى نطق الحب

لم اكن ادرك انى اخطأت عندما حسبت انى نسيتك
لم اكن اعلم انه برحيلك رحل قلبى معك وما تبقى منه يرفض
الخضوع لغيرك
تمردت الدموع واعلنت عصيانها فقط لتتركنى حائرة
هذه رسالتى الى الماضى
رسالتى التى لم استطع ان ازيد عليها حرف واحد


وفى رسالتى للمستقبل
صرخ قلبى يدعونى الا اكملها
الا احلم وتنهار الاحلام
وان اعود الى الماضى وأتأكد من نسيانه
لربما يسعدنى ان اعيش بين طياته
حتى نطق الحب
ودقت اجراس البداية الجديدة واستسلمت القلوب واعتقدت للحظة
انى احببت

تضاربت المشاعر
احيانا اشعر به على ابواب قلبى متردد فى دقها فلا نلتقى
واحيانا يدقها بعنف حتى اتردد انا فى فتحها فلا نلتقى
واحيانا تأخدنى الدموع لذكرياتى فأرفض حتى وجودك
واحيانا اخرى تتلاشى دموعى لاجلك فأسالك متى نلتقى
حتى نلتقى فأنهار امامك
واعلنها بدون تردد
احببت

مش هنساكوا

بنقابل ناس كتير فى حياتنا
يمكن مش بنقعد معاهم كتير او مش بنكلمهم الا كلمتين بس بيسيبوا فينا بصمة
ويمكن وإحنا قاعدين قعدة تجلى نفتكرهم
الغريبة إننا بنفتكر تفاصيل التفاصيل


مش هنساك يا حسام
معرفتكش غير ساعتين دول فترة الأنترفيو اللى كنا بنعمله سوا فى القرية الذكية فى 6 اكتوبر
مش هنسى إن كان عندك برد وكل ما تعطس تقولى سورى خضيتك
مش هنسى إنك مكنتش لاقى باسكيت ترمى فيه المناديل
مش هنسى انك كنت عايز تغششنى كلمة فى الأمتحان
مش هنسى إنك كنت حد كويس بجد ويا رب تكون اشتغلت لأنك تستاهل فعلاً الوظيفة
مش هنسى تريقتك على القلم الفرنساوى اللى جايبينه نملى بيه الأبليكيشن


مش هنساك يا تيمور
طبعاً عمرك ما هتعرف إننا كنا مسمينك تيمور
زميل باص الجامعة العزيز
كان اكبر منى بسنتين بس مش عايزة أقول
رغى رغى رغى
ودماغ صعيدى مش ممكن
مش هنسى يوم ما قلتلى صاحبتك لابسة تيشرت مكتوب عليه
crazy
وانتى بتاكلى مصاصة ... ما جمع الا ما وفق
ورديت عليك وقلتلك هو ده الفكر المتخلف .. مش هنسى منظرك بعد الرد المفحم ده


مش هنسك يا عم عبد الحكيم
سواق اتوبيسنا الجامد اوى
مش هنسى أنى عمرى ما فهمت منك كلمة
مش هنسى ردى عليك اللى كان كله ايوه .. نعم .. حاضر .. ياااه .. مممم

مش هنسى دكتور مهدى ودكتور محمد رفعت
أحلى زمايل فى أحلى شركة
ربنا يوفقكوا ويكرمكوا يا رب فى شغلكوا الجديد
ومبسوطة اوى أنى اتعاملت معاكوا قبل ما تسيبوا الشركة

مش هنسى مروة و مروان واحمد ومحمد ووليد
شلة تجارة اللى كانت قاعدة واقفة نايمة عندنا فى الكلية
مش هنسى قعدتنا فى المصيف زى ما كنتوا بتقولوا على الكلية
ومش هنسى كمية الضحك الخرافية اللى ضحكناها سوا
وكلامنا وزعلنا وكل حاجة

مش هنسى ناس كتير اوى اوى
دخلوا حياتى وخرجوا منها بسرعة
بس مش هيخرجوا من عقلى ابداً

دنيااااااااااااااااااااا

فى دنيا كبيرة واسعة
يطوف بها البشر بحثاً عن ركن للأستناد عليه
وجدت الكثير من الأركان
وبعد فترة من الوقت
تبادلت الأدوار
وأستندت الأركان عليّا
وأصبحت عبئاً لا أستطيع تحمله
تشتت أفكارى
وبحثت عنى وسط كل هولاء وفلم أجدنى
بحثت فى أركان الماضى
ووجدتنى أبحث عن الأركان وليس عن نفسى
دائرة مغلقة
ولا نعلم اين النهاية