Friday, January 25, 2008

هسهسة


أجلس كأننى وحدى فى الكون
أحادثه ... أحاول بقدر الإمكان أن يطول حديثى معه
أبدو سخيفة فى بعض الأحيان
لأجدنى فى النهاية أستمع إلى بعض الأغانى
يصيبنى الحنين .... لماذا هو بكل هذا البرود ؟
أبحث عن أوراقى وعن أفرب قلم تجده عيناى
لم أعرفه جيداً ولم يعرفنى جيداً ولم نتبادل الأسرار
..............................
يوقظنى فجأة من حيرتى ليخبرنى بأنه لابد من ان ينهى الحديث
يختم حديثه بلا شىء
فقط السلام المعتاد
ويختفى ... وأختفى من حياته

Sunday, January 06, 2008

هينفع ؟؟؟

ملحوظة : البوست ده إهداء لكل اللى شجعونى أرجع وعلى رأسهم ضياء , أوما , مونى , وسوسى الجميلة اللى كانت اول واحدة تعرف انى راجعة



التغيير
كلمة فى ظاهرها سهلة .... يعنى لو عايز تغير أى حاجة ممكن بسهولة اوى تغيرها
لكن يا ترى لو الحاجة دى نفسك ؟؟؟
من اول ما الأنسان بيتولد لحد ما يموت بيمر بعدة مراحل ومع كل مرحلة بتنشأ التغيرات عشان يقدر يتعايش مع المرحلة دى
والتغيرات دى معظمها بيبقى غصب عنا يعنى تغيرات فيزيائية وتغيرات فى الفكر حاجة طبيعية مبندخلش فيها

لكن فى بعض الأحيان الأنسان بيحس انه مش مرتاح مع نفسه يعنى فى صفة او لازمة فى شخصيته مش عجباه مع انه بيبقى اتعود عليها والناس اتعودوا يشوفوه بيها
ساعتها التغيير بيبقى عملية صعبة جداً وساعات الأنسان ميقدرش عليه ويحاول ويحاول لكن بيبقى مضغوط من ناحيتين
ناحية الناس اللى عايزين يشوفوه
بصورة معينة
وناحية نفسه اللى عايز يشوفها بصورة تانية
ويحس فى اللحظة دى انه خلاص بقى ماشى بشخصيتين

وكتير بتبقى المشكلة ان الحاجة اللى عايزين نغيرها دى مش حاجة وحشة يعنى بس هى صفة فينا ومش عجبانا
ورغم انك لايمكن هترضى الناس ابداً
الا انهم بيكون ليهم اكبر الأثر فى التغيير

واحيانا بتلاقى نفسك بتعمل حاجات كتير اوى انت مش عايزها بس عشان ترضى الناس
واحيانا تانية بتلاقى نفسك اكتسبت صفات
جديدة مكانتش فيك بسبب الناس
واحيانا تالتة بتلاقى نفسك بتتغير بسبب الناس
واحيانا رابعة بتلاقى نفسك مش قادر تتغير برضه بسبب الناس
وخامسة وسادسة بقى




انا شايفة ان التغيير ده دوامة كبيرة اوى وان اللى بيدخلها مبيعرفش يخرج منها
يعنى معظم اللى عايزين يتغيروا بيفضلوا طول عمرهم عايزين يتغيروا وساعات بيحسوا فعلاً أنهم اتغيروا



لكن فى الحقيقة
الحياة هى اللى بتتغير من حواليهم

Friday, January 04, 2008

It's Crazy... isn't it ?






مش عارفة ليه وإزاى ولا عارفة إذا كنت هستمر ولا هرجع اعملها تانى وأبعد

بس حسيت أنى عايزة أرجع

وحشنى أوى انى اكتب

وحشنى أنى اتفاعل مع الناس وأسمع واكتب عنهم وأسمع رأيهم

الخطوبة خدتنى طبعاً

بس كفاية عليها بقى كده

المهم إن البلوج وحشنى بجد

وإن شاء الله يكون فى موضوع جديد قريب

بس