Saturday, December 30, 2006

مش عارفة

مش عارفة
كلمة لا تحمل اى معنى أو رد فعل
ومع ذلك لقيتها واخدة مساحة كبيرة اوى من حياتى
ويمكن من حياة ناس كتير
لقيت معظم ردودى بمش عارفة
حتى وانا بتناقش فى أى موضوع
لازم تدخل فى وسط الكلام
ساعات بحس فعلاً انى مش عارفة
ومش عارفة يعنى مش عارفة دى
ممكن نقول تايهه
مش عارفة أفكر
مش عارفة أعبر
مش عارفة أنا عايزة ايه
مش عارفة انا مبسوطة ولا مضايقة
مش عارفة انا مرتاحة ولا لأ
مش عارفة انا ليه كلمت صاحبتى دى ومكلمتش صاحبتى التانية
مش عارفة ليه الفكرة دى تيجى فى بالى
مش عارفة ارد فى الموقف ده اقول ايه
عايشة والحمد لله وكويسة
بـــــــــــــــــــس
مــــش عــــارفــــة

Friday, December 29, 2006

بينى وبين نفسى


ترددت مرات و مرات............وأحتار قلمى معى..... وأخذت نفسا عميقا و ...... قررت
لن ادع هذا الشعور يهزمنى
لن اترك نفسى لأمالى الواهية
عقدت العزم
لا تنظرى للوراء..............لا تفكرى بالماضى
وبداخلى اعرف جيدا انها مجرد كلمات ترتاح لها نفسى لفترة من الزمن
وبعد
أعود.............وأبحث عن صورته
اتأملها..........و يضيع منى الوقت.........واتذكر
أحبك
حين قالها للمرة الاولى
ولأول مرة
احسست بأنى كالطفلة التى تتصنع الدلال ليحنو عليها والديها
كنت اخطو خطواتى الأولى فى طريقى للحب الابدى
و فجأة
وجدتنى تائهة
بحثت عنه فى كل مكان
تركنى
تركنى فى لحظة
تركنى فى لحظة حتى اننى لم أجد الوقت الكافى لأبكى عليه
تركنى و يا ليته يترك احلامى
ولازلت تائهة
بل حائرة
أهذا هو ما تسمونه الحب؟؟؟؟؟؟؟؟؟؟؟؟؟؟؟؟؟؟؟
أذن
فلتظل وحيدا يا قلبى

Sunday, December 17, 2006

لمة العيلة



يوم مش طبيعى
يوم الجمعة اللى المفروض أنه يوم الأجازة اللى الواحد بيقضيه فى هدوء
ص
در فيه قرار جمهورى بتجمع العيلة
وكان من المتوقع حضور 65 فرد
لكن ربنا ستر واللى قدروا يحضروا 43 بس



سيبكوا من الكبار اللى كان كل واحد ماسك ودن اللى جنبه
والدوشة والزيطة اللى استحالة تسمع فيها كلام اى حد .

سيبكوا من كمية الموبيلات اللى كانت دايرة بتصور.

سيبكوا من خناقة المخدات الشهيرة بين أمير وراجية اللى صورتها فيديو و اللى معرفش لحد دلوقتى سببها ايه
سيبكوا من
راجية اللى خدت كام خبطة فى الحيطة وفقدت الذاكرة .

سيبكوا من المخدة اللى جت فى الموبيل بتاعى وقعته على الأرض .

سيبكوا من سيف اللى قعد فى وسط الصالون بالجيتار بتاعه يعزف عليه وحط قدامة طبق بلاستيك كده يلم فيه فلوس





سيبكوا منى وانا معظم القعدة بسقف وأزغرط .

سيبكوا من باسم اللى كان بيغلس علينا وأحنا بنتصور ولقطناله حتة صورة هنذله بيها العمر كله .

سيبكوا من الناس اللى كانوا بيجى يسألونى هى مين اللى كانت قاعدة جنبى دى .

سيبكوا من الباجز بنى اللى معظم الناس طالعة فى الصور حاضناه .

سيبكوا من الأطفال اللى اتجمعوا كلهم على الكمبيوتر مشفناهمش .

سيبكوا من الهدوء القاتل اللى حسينا بيه بعض ما مشيوا
كانوا كام ساعة تحفة
وفرقوا فى الموود بتاعى كتير
والصورة اللى خدتها أنا وخوخة طلعت حلوة أوى
ربنا يخلينا لبعض
ويخلى كل واحد لعيلته
ويجعله عامر

MSG

FOR ALL WHO ENTERED MY LIFE & LEFT BUT AFTER THEY LEFT THIER SPECIAL PRINTS IN MY HEART.....
I'LL NEVER FORGET U ALL
NEVER

الوتر الحساس





كتير أوى لما نمر بتجربة وفى الغالب بتكون قاسية ونسمع أغنية بتحكى عن تجربة تشبه تجربتنا بنحبها وبنحب نسمعها ومش مهم المووود اللى بنبقى فيه بس بنستمتع بوجود شخص تانى بيشاركنا محنتنا ونقول
أصلها لمست الوتر الحساس

وساعات نسمع أغنية نحس بيها أوى ونعيشها فى خيالنا بكل تفاصيلها مع إننا عمرنا ما عشنا تجربة مشابهة ليها

وساعات نخاف يجى علينا يوم ونبقى احنا اللى فى الموقف ده

أغانى تحسسنا بالفرحة والسعادة ... تحس إنك بجد عايز ترقص من جواك

وأغانى بتجبر دموعنا على النزول

أغانى تصيبك بحالة يأس وأحباط

أغانى تقلب عليك الذكريات

أغانى تخوفك من المستقبل

أغانى تديك أمل فى بكرة

اغانى تحسسك قد ايه انت وحيد

اغانى تفتح جروح اتقفلت من زمان

أغانى تجبرك على اعادتها و ساعات سماعها طول اليوم

أغانى تبقى مش قادر تستنى وعايز تسمعها لحد بتحبه

أغانى وكل واحد بيدور فيها على نفسه

Saturday, December 16, 2006

بجيلك من ورا الأحزان



بجيلك من ورا الأحزان .... ولسه فاكر العنوان
ولسه فاكر العنوان

بجيلك من ورا الأحزان .... ولسه فاكر العنوان
ولسه فاكر العنوان

أنا حضنك وتكوينك .. والمكتوب على جبينك .. وأنا اللى فى اخر الرحلة
بلاقى عمرى فى سنينك
بجيلك ... بجيلك ... بجيلك من ورا الأحزان

وانا ليكى وعمرى انتى ... غريب من هواكى انتى ... فى لحظة ضعف تحيينى
ولما الغربة تغوينى
تردينى لحضنك يوم ... ولا غيرك هيطوينى ... فى لحظة ضعف تحيينى
ولما الغربة تغوينى
بجيلك .... من ورا الأحزان

سكوتى مش الم فيا ... وضعفك ليا حنية ... يا اول صورة فى عيونى
يا ساكنة جوا تكوينى
الام الغربة ما تأثر ... سكوتك بس يكوينى ... يا أول صورة فى عيونى
يا ساكنة جوا تكوينى
بجيلك ... بجيلك من ورا الأحزان


بجيلك من ورا الأحزان .... ولسه فاكر العنوان
ولسه فاكر العنوان

بجيلك من ورا الأحزان .... ولسه فاكر العنوان
ولسه فاكر العنوان

أنا حضنك وتكوينك .. والمكتوب على جبينك .. وأنا اللى فى اخر الرحلة
بلاقى عمرى فى سنينك
بجيلك ... بجيلك ... بجيلك من ورا الأحزان


مش عارفة ليه إفتكرت الأغنية دى فجأة
يمكن عشان حالة الحنين اللى فيها
كنت بسمعها من زمان أوى
يمكن حتى قبل ما أستوعب كل معانى كلماتها
كان بيلمسنى لحنها ورقة الكلام ورقة صوت حميد وعلاء
تحفة بكل المعايير

زمان ... وأحاسيس زمان




نفس الأحساس بتاع زمان إنك عايز تكتب كتير أوى ومش عارف تكتب ايه ولا لمين بس القلم بيجرى منك كأنه بيقرا أفكارك قبل ما أنت نفسك تستوعبها.

كلام محفوظ ومكرر و بقوله كتير كأنه فيلم عربى قديم بس ده ميمنعش إنى لسه عايزة أكتب برضه
عارف لما تبقى ماشى فى الشارع وفجأة تفتكر شخص ما ويبتدى شريط أحداث يمر قدام عينيك وتبتدى ملامح ابتسامه تغطى على ملامحك وغالباً بتفوق من كل ده على كلاكس عربية بينك وبينها 2 سم ومفيش مانع تسمع كلمتين على غرار مش تفتح يا .....
سيبك من كل ده خليك فى اللى افتكرته .. مش عايزين نسمح لحد يفوت علينا اللحظة الحلوة دى
ذكريات كتير فى حياتنا ساعات بيبقى نفسنا الزمن يرجع بينا تانى يا اما عشان نصحح غلط ومنعرفش الحد الفلانى ونمسح من ذاكرتنا الفترة العصيبة اللى عشناها بسببه يا اما عشان نعرف الحد الفلانى اكتر ونكلمه أكتر ومنسمحلوش يختفى من حياتنا

بعدها تبتدى تدندن بأغنية جت فى بالك متعرفش ليه
وتسأل نفسك انا بفتكر الحاجات دى ومتلاقيش إجابة
وتكمل مشى عادى
وتنسى كل حاجة

وعجيبة يا شوارع تشبه ملامحانا ... أعجب مافيكى إحنا ... الله يسامحنا

Tuesday, December 12, 2006

عايزة أناااااام

نفس الفكرة اللى بصحى عليها يومياً تقريباً
عايزة أناااااااااام


هو فيه ايه النهاردة ؟
إحساس غريب ونظرة حزن فى عينيا طبعاً انا مش شايفاها بس حاسة بيها
شكله يوم ممل ... هو النهاردة ايه
الثلاثاء
هو بعينه بغباوته
من أيام الدراسة واليوم ده واقف فى زورى
يييييييييي
بتاوب من دلوقتى وأنا لسه فى المترو
أومال هقضى التسع ساعات الجايين إزاى
أعمل ايه يعنى ... عايزة أناااام


مكتبى العزيز
مش عارفة ليه بمجرد ما بقعد على الكرسى بفتكر هنيدى فى فيلم صعيدى فى الجامعة الأمريكية لما كان فى الكافيه مع طارق لطفى وقاله مش تعملوا كراسى على قد الزباين
مش هينفع كده أنا شكلى هنام بجد
مفيش غير كوباية شاى سخنة هى اللى هتفوقنى
وطبعاً لازم اسمع كلمتين من ابراهيم عامل البوفيه من نوعية من إمتى وخلصولنا الشاى بقى بس تهريج طبعاً

الله
منظر البخار الخارج من الشاى بيحسسك بالدفا
الشاى تقيل المرة دى مع انه عارف إنى بحبه خفيف أوى
بس هشربه برضه
لأ بجد فى ايه
حبكت يعنى الدكتور يخرج يسألنى على حاجة فى اللحظة اللى بتاوب فيها
شكلى وحش أوى
مش مهم ... أعمل ايه يعنى ... عايزة أناااام

شغل
أحمدك يا رب
هما 3 أجهزة بس
مش هياخدوا وقت ... بس مفيش مانع أنى اتلكع وادلع واستهبل شوية عشان ياخدوا وقت
خلصوا
وها قد غادر أخر شخص معايا فى الشقة
يعنى صباح الفراغ والهدوء
إبراهيم تانى
قعد ينكت وضحكت
قالى جملة حلوة أوى
قالى مفيش حاجة بتضيع هم الشغل غير الضحك والأبتسامة
قلتله مش هم الشغل بس ده بيضيع كل حاجة
قالى الا العمر ... ورنت فى ودنى الكلمة دى

لازم يقطعوا عليا لحظة الهدوء
أهو عم ياسر عايز ينضفلى المكتب
يا عينى كل مرة يفضل يمسح فى الكىبورد اللى انا هارياها شخبطة

دقات الواحدة والنصف تعلن عن معاد طلوعى الدور اللى فوق عشان أصلى الظهر واستنى العصر وأصليه بالمرة
بفضل قاعدة فوق بحجة عمل ورق وأى حاجة عشان منزلش الا قبل معاد المغادرة بحاجة بسيطة يعنى يادوب وقت يسمحلى إنى اقفل الكمبيوتر و اتمم على الشقة وأقفل دولابى بالمفتاح

دقات الرابعة والنصف
تعلن عن انتهاء وقت العمل الرسمى وانتهاء يومى معاه
أصلى هروح البيت اعمل ايه هنام وأصحى احضر حاجة بكرة والحق أنام تانى

وبعد 11 محطة مترو ومكيروباص من المترو لبيتنا

تصبحوا على خير

Sunday, December 10, 2006

أول مرة





أول مرة فى حياة كل أنسان بتبقى أصعب مرة ودى حاجة معروفة
سواء أول مرة مشى أو حب ولا حتى عوم
وبتجر باقى المرات بعديها وبتبقى اسهل كتير أوى
أول يوم دراسة
أول يوم شغل
أول يوم جواز
كلها بيبقى ليها قيمة كبيرة عندنا
ويمكن بنحتفظ بذكرياتها طول العمر
لأنها غالباً بترتبط بموقف كوميدى او محرج

أول يوم دراسة
أكدب لو أقول فاكراه
بس بيقولولى أنى لا عيطت ولا حاجة
وانى كنت مبسوطة بالجو الجديد

أول يوم ثانوى
اتنقلت من مدرسة اعدادى الخاصة لمدرسة ثانوى عام
صحيح كل أصحابى كانوا معايا بس اول مرة ننفصل فى الفصول
وكنت انا على حظى لوحدى تماماً
كان يوم بشع وكنت بتمنى يعدى بقى عشان اشوفهم
وخدت وقت طويل على ما اتعرفت على ناس
وبعدها الموضوع بقى سهل اوى وتقريباً عرفت المدرسة كلها

أول يوم جامعة
فرحة مش ممكن
وابتسامة غير عادية
كنت مشغولة ببص على كل الناس
بتفرج على دنيتى الجديدة اللى هقضى فيها أربع سنين من عمرى
لحسن حظى انى كان معايا انتيمتى من ابتدائى نرمين
وكانت معايا فى نفس الكلية ونفس القسم كمان
وهى اللى صبرتنى بصراحة على سنين الكلية

أول مرة ازوغ من محاضرة
كانت فى سنة تانية فى النص الأول
كان ضميرى واجعنى اوى
وقعدت ساعة على ما قررت اسيبها
وحتى كنت ماشية مروحة البيت يعنى مش هخرج ولا حاجة
بس بعد كده بقى نادر انى احضر اصلاً

أول يوم شغل
كأنه لسه امبارح
قلق فظيع وترقب رد فعل اللى حواليا
كنت مبسوطة طبعاً
ومش عارفة اليوم عدى عليا إزاى
بس اتعلمت حاجات كتير أوى
عرفت فى اليوم ده ارقام واسامى وكان ناقص اطبقها على الوشوش بقى

ودى كانت اخر اول مرة فى حياتى لحد دلوقتى

إهداء لأحلى خوخة


Saturday, December 09, 2006

حتى نطق الحب


لم اكن ادرك انى اخطأت عندما حسبت انى نسيتك
لم اكن اعلم انه برحيلك رحل قلبى معك وما تبقى منه يرفض
الخضوع لغيرك
تمردت الدموع واعلنت عصيانها فقط لتتركنى حائرة
هذه رسالتى الى الماضى
رسالتى التى لم استطع ان ازيد عليها حرف واحد


وفى رسالتى للمستقبل
صرخ قلبى يدعونى الا اكملها
الا احلم وتنهار الاحلام
وان اعود الى الماضى وأتأكد من نسيانه
لربما يسعدنى ان اعيش بين طياته
حتى نطق الحب
ودقت اجراس البداية الجديدة واستسلمت القلوب واعتقدت للحظة
انى احببت

تضاربت المشاعر
احيانا اشعر به على ابواب قلبى متردد فى دقها فلا نلتقى
واحيانا يدقها بعنف حتى اتردد انا فى فتحها فلا نلتقى
واحيانا تأخدنى الدموع لذكرياتى فأرفض حتى وجودك
واحيانا اخرى تتلاشى دموعى لاجلك فأسالك متى نلتقى
حتى نلتقى فأنهار امامك
واعلنها بدون تردد
احببت

مش هنساكوا




بنقابل ناس كتير فى حياتنا
يمكن مش بنقعد معاهم كتير او مش بنكلمهم الا كلمتين بس بيسيبوا فينا بصمة
ويمكن وإحنا قاعدين قعدة تجلى نفتكرهم
الغريبة إننا بنفتكر تفاصيل التفاصيل


مش هنساك يا حسام
معرفتكش غير ساعتين دول فترة الأنترفيو اللى كنا بنعمله سوا فى القرية الذكية فى 6 اكتوبر
مش هنسى إن كان عندك برد وكل ما تعطس تقولى سورى خضيتك
مش هنسى إنك مكنتش لاقى باسكيت ترمى فيه المناديل
مش هنسى انك كنت عايز تغششنى كلمة فى الأمتحان
مش هنسى إنك كنت حد كويس بجد ويا رب تكون اشتغلت لأنك تستاهل فعلاً الوظيفة
مش هنسى تريقتك على القلم الفرنساوى اللى جايبينه نملى بيه الأبليكيشن


مش هنساك يا تيمور
طبعاً عمرك ما هتعرف إننا كنا مسمينك تيمور
زميل باص الجامعة العزيز
كان اكبر منى بسنتين بس مش عايزة أقول
رغى رغى رغى
ودماغ صعيدى مش ممكن
مش هنسى يوم ما قلتلى صاحبتك لابسة تيشرت مكتوب عليه
crazy
وانتى بتاكلى مصاصة ... ما جمع الا ما وفق
ورديت عليك وقلتلك هو ده الفكر المتخلف .. مش هنسى منظرك بعد الرد المفحم ده


مش هنسك يا عم عبد الحكيم
سواق اتوبيسنا الجامد اوى
مش هنسى أنى عمرى ما فهمت منك كلمة
مش هنسى ردى عليك اللى كان كله ايوه .. نعم .. حاضر .. ياااه .. مممم

مش هنسى دكتور مهدى ودكتور محمد رفعت
أحلى زمايل فى أحلى شركة
ربنا يوفقكوا ويكرمكوا يا رب فى شغلكوا الجديد
ومبسوطة اوى أنى اتعاملت معاكوا قبل ما تسيبوا الشركة

مش هنسى مروة و مروان واحمد ومحمد ووليد
شلة تجارة اللى كانت قاعدة واقفة نايمة عندنا فى الكلية
مش هنسى قعدتنا فى المصيف زى ما كنتوا بتقولوا على الكلية
ومش هنسى كمية الضحك الخرافية اللى ضحكناها سوا
وكلامنا وزعلنا وكل حاجة

مش هنسى ناس كتير اوى اوى
دخلوا حياتى وخرجوا منها بسرعة
بس مش هيخرجوا من عقلى ابداً

دنيااااااااااااااااااااا

فى دنيا كبيرة واسعة
يطوف بها البشر بحثاً عن ركن للأستناد عليه
وجدت الكثير من الأركان
وبعد فترة من الوقت
تبادلت الأدوار
وأستندت الأركان عليّا
وأصبحت عبئاً لا أستطيع تحمله
تشتت أفكارى
وبحثت عنى وسط كل هولاء وفلم أجدنى
بحثت فى أركان الماضى
ووجدتنى أبحث عن الأركان وليس عن نفسى
دائرة مغلقة
ولا نعلم اين النهاية

نهير ... وايه يعنى ؟؟


نهير
أيه يعنى
اسم زى باقى الأسامى
صحيح جديد ومش منتشر
وبيحسسنى إنى حد مختلف
بس برضه عادى
كان عاملى مشاكل كتير أوى وخاصة أيام الدراسة
وكان غالباً كل اللى يقراه لازم يلخبط الحروف ويشوهه
وكل اللى يسمعه لازم يقول اى حاجة من نوعية وده من ايه ده
بس حالياً الموضوع مبقاش صعب اوى كده
مع انتشار اسماء كتير متفهمش فين اولها من اخرها
سيبكوا من ده كله
أحساس حلو برضه ان حد يكتبلك شعر إهداء لاسمك
ميرسى أوى يا لؤى

نهــــــــــير الحــــــــــــــــب


في بحر من ظلمة ليل متمرد
احساس يقلب تاريخي
نابع من نهر متجدد
نهر يجتاح الصرخات
ويحطم كل الطرقات
ويزرع يأسا في زمن الوجه المتشرد
ليحارب كل الكلمات
لكن
يتفرع منه نهير من حب
يتدفق من كل الانفاس
يتنفس كل الانفاس
ينثر عبق الحب في كل مكان
يسافر عبر العشق
يسافر في كل الازمان
ليقف في وجه النهر الغاضب
يتحدى وجه الطوفان
ليعانق حبا اضنته الدموع
ويشفي جرحا ادماه الشجن
ليصالح قلبا تخنقه الضلوع
وحب حطمه الزمن
ويحارب حلم الليل الغاضب
ويجدد في القلب الامل

هو كما لم يعرفه احد

احساس حلو اوى أنك لما تحب تلاقى الأنسان اللى انت بتحبه ده حد تانى غير اللى الناس بتتكلم عليه
ساعتها بتحس أنك الأنسان الوحيد اللى عرفته صح
الأنسان الوحيد اللى شفت جواه
ولمست كل جوانب حياته
إنك عرفته كما لم يعرفه أحد


قالوا عنه

قالوا عنه ضحوكاً , كثير الهزار , لا تفارقه ابتسامته
قالوا عنه هادئاً , يرى فى نفسه خير المجالس , لا يجيد التعبير عن نفسه
قالوا عنه اعز الاصدقاء , ومصدر النصائح , واهل الثقة , والطبيب النفسى فى بعض الاحيان
قالوا عنه رجلاً بكل ما تحمل الكلمة من معان , والمسئوليه مهمته فى الحياة
بل قالوا عنه انه اخر الرجال المحترمين , من يعرفه يشعر انه جزء منه او ربما فرد من عائلته

وعرفته

عرفته يطوى بداخله جبالا من الاحزان يخفيها فى ابتسامته ولا يستطيع اخفائها من عينيه
عرفته يهوى الكلام , ولا يعترف بالصمت, بل هزت كلماته اعماقى , وسكنت افكارى للأبد
عرفته مصدر مشع للحنان , قوة هائلة من العاطفة , قنبلة موقوتة من الحب
عرفته طفلاً يتعلق بأبسط الاشياء , يثور لأتفه الأسباب , يتشبث بيدى اينما كنا

عرفته
كما لم يعرفه احد

Friday, December 08, 2006

دراما ... وعجبانى


عندك حق .. لو مش عايزة تبصى فى وشى عندك حق
أنا ضيعت أجمل وأطهر حب .. ضيعته ليه ... عشان جرحتى كرامتى
طب ما انا جرحت قلبى وقلبك
عشان التقاليد والناس
طب ما انتى كل الناس

كفاية يا ابراهيم
كفاية تعذب نفسك بيا زى ما عذبت نفسى بيك
انت لسه فى دمى

نور الشريف وبوسى فى حبيبى دائماً




هما الطيبين كده بايخين .. مبيحفظوش الجميل

أحمد حلمى فى جعلتنى مجرماً



قلتله اننا لازم نبعد بس الظاهر انى مش قد البعد ده
خالد بقى ... انا حتى مش فاكرة حياتى من قبله كانت عامله إزاى

منى ذكى فى سهر الليالى


قبل ما يمشى قعد يعلمنى حاجات حاجات كتير واتهيأله انى كده هعرف اعيش من غيره
بس نسى يعلمنى اهم حاجة
نسى يعلمنى أعيش من غير ما اتنفس

منة شلبى فى انت عمرى



انت متنفعش تكون اب لولادى ... حازم انا مش عايزة أحرجك اكتر من كده
أنسانى يا حازم

مش قاااااااااااااااااااادر

حلا شيحة وهانى سلامة فى السلم والتعبان


don't worry if they ask me what the thing i love the most in my life
i'll say YOU

meg ryan in city of angels

أنت عمرى ... أختفى ؟؟؟

بقيت شعلة نشاط مرة واحدة وقررت أنى أزبط البلوج أو على الأقل أنزل مواضيع جديدة وفى وسط زحمة المواضيع لقيت فجأة موضوع بعنوان انت عمرى اختفى
هى كانت حالة بعد ما اتفرجت على فيلم انت عمرى خلتنى كتبت موضوع اقتبست فيه كلمات من الفيلم وعلقت عليه
زعلت اوى لأنى كنت حابة الموضوع وكنت عايزة إجابات على أسئلتى
ومعرفتش أكتبه تانى ولا ايه ؟
بصراحة لقتنى مش هعرف اعيده تانى لأنها كانت حالة مسيطرة عليا بعد ما شفت الفيلم للمرة المليون
يمكن لما أشوفه تانى أبقى اكتبه
بس أسئلتى كانت ( للى اتفرجوا على الفيلم بس ) يا ترى شمس دى كانت نزوة فى حياة يوسف
بس إزاى ده لما سابها مات ؟؟؟
طب يا ترى هو كان بيحب مراته بجد
اللى يشوف اول الفيلم يتاكد فعلاً انه كان بيحبها
طب هو ممكن اكون بحب حد بجد واتجة ناحية حد تانى واحبه لمجرد انى بشوفه كل يوم
أو لمجرد انى مشتركة معاه فى نفس المرض؟؟؟
كل مرة اتفرج على الفيلم أسال نفسى نفس الأسئلة ومش بلاقى اى اجابة
ولسه مش قادرة الاقى حد يقنعنى برأيه فى الموضوع ده
بس بستمتع بكل دمعة بتنزل منى وانا بتفرج عليه

أنا رومانسية وخلاص



مفهوم الرومانسية

يعنى ايه رومانسية ؟ سؤال بيدور فى دماغى بقاله فترة طويلة اوى خاصة وان كتير من الشباب حاليا اما ان يطلقوا على نفسهم لقب رومانسيين او يسخروا من الرومانسية
بس اللى انا عايزة اعرفه بجد هل الرومانسية كلمة زى باقى الكلمات ليها مفهوم محدد ونقدر نقول الرومانسية هى كذا وكذا
ولا هى احساس مينفعش نعرفه...اللى لاحظته برضه ان الرومانسية بتختلف تماماً من شخص لأخر يعنى بيعتبروها جو معين وكل واحد بيخلق الجو بتاعه بالطريقة اللى هو عايزها
فى جو الرومانسية بتاع زمان من شموع لورد لموسيقى هادية ... وده بصراحة النوع اللى أنا بحب اعيش فيه وعارفة انه ملوش مكان دلوقتى فى زحمة الحياة بس ادينا بنحلم
وفى ناس الرومانسية عندهم يلاقوها فى بعض الكلمات زى بحبك او وحشتينى وبيكتفوا بكده و بتكون هى الكلمات دى كل دنيتهم
فى ناس الرومانسية بالنسبة ليهم احساس بيوصل لوحده بالقلب مجرد انى احس بحنان و عطف اللى قدامى دا كفاية عليا
وفى ناس الرومانسية بالنسبة ليهم افعال يعنى احب دايما انى المس الرومانسية
وفى بيكتفوا بالنظرات وفى وفى وفى
بس فى الحالات اللى فاتت الرومانسية دايما مرتبطة بشخص اخرطب لو مفيش الشخص الأخر ده هل مينفعش يكون فى رومانسية فى حياتنا
طب لو انت او انتى شايفين نفسكوا رومانسيين انتوا رومانسيين ليه يعنى ايه الأختلاف ما بينكوا و بين الشخص العادى؟

مش عارفة بقى بس هو كده انا رومانسية وخلاص

ايه الهبل ده ؟؟



سألت نفسى السؤال ده وانا بتفرج على بلوجات ناس كتير
طبعاً الهبل مش فى بلوجات الناس
الهبل فيا انا ... بلا فخر طبعاً
حسيت فجاة انى جوايا كلام كتير أوى
وإنى لازم أشتغل فى البلوج بتاعى بدل منا ركناه على الرف كده خالص
مش هتحجج بقى بالشغل ومش فاضية وعلى ايه يعنى
لأ بجد اكتشفت انه ممكن يفرغ شحنات كتير جوايا
سواء بقى حب ولا عصبية ولا ضيق ولا اى كلام
المهم انى اكون واخدة راحتى وبتكلم من قلبى
عامل زى الأجندة اللى قافلة عليها بالمفتاح فى دولابى فى الشغل
كل أما أزهق او احس انى عايزة احكى حاجة لحد بحكيلها
خلاص هرميها ... مع كامل أحترامى للاجندة يعنى
أصلى لازم اجارى العصر
الأجندة دى بتاعت زمان
دلوقتى فى بلوجى
بحبك يا بلوجى