بقيت شعلة نشاط مرة واحدة وقررت أنى أزبط البلوج أو على الأقل أنزل مواضيع جديدة وفى وسط زحمة المواضيع لقيت فجأة موضوع بعنوان انت عمرى اختفى
هى كانت حالة بعد ما اتفرجت على فيلم انت عمرى خلتنى كتبت موضوع اقتبست فيه كلمات من الفيلم وعلقت عليه
زعلت اوى لأنى كنت حابة الموضوع وكنت عايزة إجابات على أسئلتى
ومعرفتش أكتبه تانى ولا ايه ؟
بصراحة لقتنى مش هعرف اعيده تانى لأنها كانت حالة مسيطرة عليا بعد ما شفت الفيلم للمرة المليون
يمكن لما أشوفه تانى أبقى اكتبه
بس أسئلتى كانت ( للى اتفرجوا على الفيلم بس ) يا ترى شمس دى كانت نزوة فى حياة يوسف
بس إزاى ده لما سابها مات ؟؟؟
طب يا ترى هو كان بيحب مراته بجد
اللى يشوف اول الفيلم يتاكد فعلاً انه كان بيحبها
طب هو ممكن اكون بحب حد بجد واتجة ناحية حد تانى واحبه لمجرد انى بشوفه كل يوم
أو لمجرد انى مشتركة معاه فى نفس المرض؟؟؟
كل مرة اتفرج على الفيلم أسال نفسى نفس الأسئلة ومش بلاقى اى اجابة
ولسه مش قادرة الاقى حد يقنعنى برأيه فى الموضوع ده
بس بستمتع بكل دمعة بتنزل منى وانا بتفرج عليه
2 comments:
انا شفت الفيلم وبشوفه كتيييير موت كل مااكون مدايقه عشان اطلع اللي فيا !!
انا لما شفتو اول مره عيطت وحبيتو اوي بس لما طلعت من السينما قلت الفيلم فيه حاجات كتيره راكبه غلط
يعني منه شلبي بتحب جوزها كده ومش حارماه من حاجه وست جميله وشيك وكلو تمام...ليه بقى لما ييجي يموت يروح يحب عليها واحده تانيه ويسيبها هي !!
بصي في اعتقادي الشخصي هو بيحب مراته جداً لكن في حالات المرض ربنا يبعدك عنها الواحد بيبقى شايف كل حاجه بمنظور مختلف...يعني شايف انه هيظلم مراته معاه لو عاش معاها اكتر من كده مع انه كده كده هيموت..وكان لازم يحب شمس لانها اللي شجعتو على العلاج ومعاه خطوه بخطوه وشريكته في المرض...زائد انهم بيشوفوا بعض زي ماقلتي كل يوم ..وهي انسانه جميله ومافيهاش حاجه وحشه بالعكس دي قريبه له جداً...فكان لازم يتعلق بيها في حاله انه كان شخص طبيعي...وكان لازم يحبها في حاله مرضه دي
لانها الانسب والاقرب له بعد ماساب مراته وابنه...
بس بردو منه اتظلمت في الفيلم جامد وبجد عيطت جامد اوي عشانها...
الفيلم ممكن يكون فيه بعض حاجات مش لوجيكالي اوي بس بيجبرك انك تعيشي مع كل واحد حالته وتعيطي معاه ... الفيلم تحفه دراميه !!
ميرسي ياقمرايه خالص انا كان نفسي اتكلم مع حد بتوسع على الفيلم ده..!
هى بصراحة غلطة المؤلف فى كتابة شخصية منة لأنها شخصية مظلومة تماماً وملهاش أى ذنب فى كل اللى حصل سواء فى مرضه أو تقربه من واحدة تانية
وكان لازم يعرف إن كل الناس هتبقى متعاطفة معاها وجايز تكره يوسف وشمس كمان
بس برضه رغم كل ده مش قادرة استوعب انه ممكن يحب تانى بالسهولة دى
ساعات ببرر وأقول يمكن هو حس أنه مختلف عن مراته أو أقل منها لكن حس أنه زى شمس بالضبط
بس بالنسبة لأى حد الزواج ده شىء مقدس
ومش اى حاجة كده تأثر فيه
Post a Comment