مفهوم الرومانسية
يعنى ايه رومانسية ؟ سؤال بيدور فى دماغى بقاله فترة طويلة اوى خاصة وان كتير من الشباب حاليا اما ان يطلقوا على نفسهم لقب رومانسيين او يسخروا من الرومانسية
بس اللى انا عايزة اعرفه بجد هل الرومانسية كلمة زى باقى الكلمات ليها مفهوم محدد ونقدر نقول الرومانسية هى كذا وكذا
ولا هى احساس مينفعش نعرفه...اللى لاحظته برضه ان الرومانسية بتختلف تماماً من شخص لأخر يعنى بيعتبروها جو معين وكل واحد بيخلق الجو بتاعه بالطريقة اللى هو عايزها
فى جو الرومانسية بتاع زمان من شموع لورد لموسيقى هادية ... وده بصراحة النوع اللى أنا بحب اعيش فيه وعارفة انه ملوش مكان دلوقتى فى زحمة الحياة بس ادينا بنحلم
وفى ناس الرومانسية عندهم يلاقوها فى بعض الكلمات زى بحبك او وحشتينى وبيكتفوا بكده و بتكون هى الكلمات دى كل دنيتهم
فى ناس الرومانسية بالنسبة ليهم احساس بيوصل لوحده بالقلب مجرد انى احس بحنان و عطف اللى قدامى دا كفاية عليا
وفى ناس الرومانسية بالنسبة ليهم افعال يعنى احب دايما انى المس الرومانسية
وفى بيكتفوا بالنظرات وفى وفى وفى
بس فى الحالات اللى فاتت الرومانسية دايما مرتبطة بشخص اخرطب لو مفيش الشخص الأخر ده هل مينفعش يكون فى رومانسية فى حياتنا
طب لو انت او انتى شايفين نفسكوا رومانسيين انتوا رومانسيين ليه يعنى ايه الأختلاف ما بينكوا و بين الشخص العادى؟
مش عارفة بقى بس هو كده انا رومانسية وخلاص
1 comment:
شوفي يا بنتي خليكي رومانسيه وانبسطي ولو موش متجوزه اتجوزي وهاتي عيال وربيهم وخلي بالك منهم واعبدي ربك كويس جدا وبعد 80 سنه موتي .
وانشاء الله تخشي الجنه .
وتوته توته وخلصت الحدوته .
لان لا انتي ولا ال 75 مليون حيقدروا يعملوا اكتر من كده .
خديها ببساطه .
ملحوظه ممكن تجيلك فكره ننتحر دلوقت وخلاص . هي فكره بس مانصحكيش ولا انصح اي حد بيها لان كده حتخشي النار
Post a Comment