نفس الأحساس بتاع زمان إنك عايز تكتب كتير أوى ومش عارف تكتب ايه ولا لمين بس القلم بيجرى منك كأنه بيقرا أفكارك قبل ما أنت نفسك تستوعبها.
كلام محفوظ ومكرر و بقوله كتير كأنه فيلم عربى قديم بس ده ميمنعش إنى لسه عايزة أكتب برضه
عارف لما تبقى ماشى فى الشارع وفجأة تفتكر شخص ما ويبتدى شريط أحداث يمر قدام عينيك وتبتدى ملامح ابتسامه تغطى على ملامحك وغالباً بتفوق من كل ده على كلاكس عربية بينك وبينها 2 سم ومفيش مانع تسمع كلمتين على غرار مش تفتح يا .....
سيبك من كل ده خليك فى اللى افتكرته .. مش عايزين نسمح لحد يفوت علينا اللحظة الحلوة دى
ذكريات كتير فى حياتنا ساعات بيبقى نفسنا الزمن يرجع بينا تانى يا اما عشان نصحح غلط ومنعرفش الحد الفلانى ونمسح من ذاكرتنا الفترة العصيبة اللى عشناها بسببه يا اما عشان نعرف الحد الفلانى اكتر ونكلمه أكتر ومنسمحلوش يختفى من حياتنا
بعدها تبتدى تدندن بأغنية جت فى بالك متعرفش ليه
وتسأل نفسك انا بفتكر الحاجات دى ومتلاقيش إجابة
وتكمل مشى عادى
وتنسى كل حاجة
وعجيبة يا شوارع تشبه ملامحانا ... أعجب مافيكى إحنا ... الله يسامحنا
2 comments:
klamek 7asrt beeeh mooot ya nona la2eni bey7sali keda kter...begad thanks 3shan bet2oli 7agat kter mosh ba3raf a2olha..Love u my twin :)
elklam dh mo3zmna bey3mloh bgd
wna lazm kol yom wna rag3a mel sho3'l w mshya fel share3 ala2ini kda b3'ni lw7dy
Post a Comment